На 29.03.2012 се одржа конференцијата на САД – Јадранската група на тема “Заеднички предизвици и здружени решенија”.



Настанот беше организиран од министерството за одбрана на Република Македонија. Конференцијата беше одржана во духот на продолжување на процесот помеѓу земјите од Јадранската група, во насока на промоција на регионалниот дијалог, унапредувањето на одбранбената соработка и зајакнувањето на националните капацитети.

На конференцијата учествуваа министерот за одбрана на Република Македонија, Фатмир Бесими претставници на А5 земјите и на САД, и тоа: Селесте Валандер, заменик-помошник на секретарот за одбрана за Европа и Евроазија, Арбен Имами, министер за одбрана на Албанија, Мирко Околиќ, заменик-министер на БиХ, Анте Котромановиќ, министер за одбрана на Хрватска, Милица Пејановиќ-Ѓуришиќ, министер за одбрана на Црна Гора, како и Арбен Чеку, министер за косовските безбедносни сили, Александра Пападополу, амбасадор на Република Грција и останати претставници на НАТО и на Словенија.

Како гости, свој придонес дадоа и високите претставници на Атлантските асоцијации од регионот: проф. д-р Радован Вукадиновиќ, потпретседател на Светската Атлантска Асоцијација – АТА и претседател на АТА Хрватска, Саво Кентера, претседател на АТА Црна Гора, Кристаќ Бирбо, извршен секретар на АТА Албанија.

Конференцијата ја отворија министерот за одбрана на Република Македонија, Фатмир Бесими и претседателот на Република Македонија, Ѓорѓе Иванов.

По првичното отворање на конференцијата, учесниците на Конференцијата дадоа придонес и разменија мислења на темата „Предизвиците и перспективите на евроатлантската интеграција во промовирање на одржлив мир и развој на регионот“.

Министрите за одбрана на земјите-потписнички на Јадранската повелба и САД, потпишаа и Заедничка повелба (Заедничка повелба потпишана на конференцијата на министрите за одбрана на САД-Јадранската група, 29 март 2012) со која се потврдува континуираниот дијалог и достигнувањата на групата А5 и се изразува поддршка за сите земји од регионот во насока на продолжување на имплементацијата на одбранбените реформи.

Свој придонес на оваа конференција даде и претседателот на Евро-Атлантскиот Совет на Македонија и потпретседателот на Светската Атлантска Асоцијација - АТА, Лазар Еленовски кој зборуваше за предизвиците на регионот во пресрет на НАТО самитот во Чикаго и за новиот Smart Defence концепт на НАТО кој треба да биде усвоен на Самитот во Чикаго.